WATOTO NI DHAHABU

Namshukuru Muweza, Mungu mwenye huruma

Aliye nipa kuweza, nimeamka salama

Ninaanza na kuwaza, yale yaliyo na  hekima

Watoto kama Dhahabu, itunze  itakutunza

                   

Si vyema kuwapuuza,watunzeni kwa adabu

Kadhalika kuwabeza,yafaa mjitanibu

Vitendo vya kuchukiza, msiwe navyo karibu

Watoto kama Dhahabu, itunze  itakutunza

Yafaa kuwatuliza, bila kufanya ghadhabu

Mazuri mkiwaeleza, watakuwa wastarabu

Hata wakiteleza, rahisi kujinasibu

Watoto kama Dhahabu, itunze  itakutunza

Watoto mkiwakuza, umea kama zabibu

Wakubwa muwe wa kwanza, nyenzo zenu kuzitibu

Wadogo wanachukiza,kuwalea  kubwa tabu

Watoto kama Dhahabu, itunze  itakutunza

Wewe Mungu kakukuza, daraja umekasibu

Na mwana ukimtunza, atageuka dhahabu

Hatua zake zakwaza, zinataka mahesabu

Watoto kama Dhahabu, itunze  itakutunza

Abadani ukiweza, wewe ni bingwa tabibu

Lakini  ukiwabeza, kwa jazilizo la gubu

Utajichonga jeneza, kujitia magadhabu

Watoto kama Dhahabu, itunze  itakutunza

Mimi siwapi bughuza, mkafura maghadhabu

Ila ninawaeleza, mpate japo taibu

Sifa ya mwana kutunza, na  sio kuwasulubu

Watoto kama Dhahabu, itunze  itakutunza

Mwana anakengeza, na mwingine wa ububu

Allahu Rabi Muweza, hugawa pasi na kubu

Hatunabudi kutunza, pasipo ona aibu

Watoto kama Dhahabu, itunze  itakutunza

Pale mnapo wafunza, bila kuleta aibu

Wakutoa istiza, ukapata na swawabu

Tena nina sisitiza, mtoto ni kama dhahabu

Watoto kama Dhahabu, itunze  itakutunza

La mwisho la kumaliza, sikia Bwana Hatibu

Zingatia bi Eliza, jiepushe  izarabu

Usijekunishangaza, tapokwona babu babu

Watoto kama Dhahabu, itunze  itakutunza