NYUMBA YANUKA UOZO

Kwakweli nasikitika, tena Napata simanzi

Shairi naliandika, huku mwili una ganzi

Hivi nipo Afirika, aheri ningekuwa mpanzi

Masikini nyumba yangu,inanukia uozo

Watu tuliowataka, tukaita watetezi

Leo wameshapotoka, watuita wachochezi

Juha ajabu kusikika, hata umnoe kwenzi

Masikini nyumba yangu,inanukia uozo

Usiku naweweseka,ninakosa usingizi

Mda wote wa mashaka, nimeshaukosa ulinzi

Ninashindwa kumulika, inazizima kurunzi

Masikini nyumba yangu,inanukia uozo

Tulivowapa madaraka, chapu mkaanza kazi

Twadhani watu hakika, na kumbe ni mabazazi

Ajabu kubwa nacheka, huku natokwa machozi

Masikini nyumba yangu, inanukia uozo

Nimekua kwa haraka, kujua nini upuzi

Bora tu ningejivuta, ningechelewa makuzi

Nilitaka kutukuka, juu nizipande ngazi

Masikini nyumba yangu, inanukia uozo

Mbona mnababaika, kazeni vyenu vitanzi

Chakuoza hunuka,na  kuzuia ni njozi

Yote mnayoyataka, kuyazuia hatuwezi

Masikini nyumba  yangu,inanukia uozo

Mizoga hukutanika, hushonana kama uzi

Hunywea na kutanuka, na kuwafyata watunzi

Walimu hujumuika, kuwahasi wanafunzi

Masikini nyumba yangu,inanukia uozo

Nini wanafaidika, hawana penzi la hirizi

Wafu wataka fufuka, wazima nyingi tatizi

Hasidi anahizika, kutupatia buguzi

Masikini nyumba yangu,inanukia uozo

Walijitoa sadaka, kupigania malezi

Leo yameshatufika, kipofu asaka mwezi

Upepo unazunguka, haufai kubarizi

Masikini nyumba yangu, inanukia uozo

Hofu zinaongezeka, muiba haki si mwizi

Ingawa tunatabika, na vilio kwenye tenzi

Hatuwezi kuokoka,tumekanyaga telezi

Masikini nyumba yangu,inanukia uozo