KIGEUGEU

Maji yameshamwagika, kilakitu ki mrama

Kigeugeu geuka, kupinduka si kilema

Hadhi haitashuka, utajipa tu heshima

Kigeugeu geuka, kupinduka si kilema

Tumejawa na mashaka, mwenzetu si mtu mwema

Kwa yanayotendeka, kuficha si jambo jema

Si haki kutugeuka, kutaka kutula nyama

Kigeugeu geuka, kupinduka si kilema

Kwa tonge twapumbazika, ili twache kulalama

Na ghadhabu yatushika, akili yako kupima

Limbukeni kuzuzuka, tumevagaa ukoma

Kigeugeu geuka, kupinduka si kilema

Walokupa uhakika, na leo wanachechema

Wakaziba na viraka, kukupatia neema

Walilala kwe vichaka, kukujazia hekima

Kigeugeu geuka, kupinduka si kilema

Japo tabu yakushika, aibu kurudi nyuma

Mbona umeshaumbuka, ni budi kushika tama

Nguo ishakuvuka, kigeugeu chutama

Kigeugeu geuka, kupinduka si kilema

Lawama tunakutwika, watuletea dhahama

Ukweli unakatika, vipande kama vya nyama

Mara kukipambazuka, kitakupata kiyama

Kigeugeu geuka, kupinduka si kilema

Giza litapotoweka, tutaitosa huruma

Tajua tuvoudhika, na nuru haita koma

Ninakwambia hakika, geuka uwe salama

Kigeugeu geuka,kupinduka si kilema