TETESI : Man United yamfukuzia Moussa Dembele

Yawezekana United wamepoteza moto na Griezmann, na kinda wa Celtic anaonekana kuwa mchezaji anayewavutia zaidi kwa sasa

Manchester United imeripotiwa kuwa kwenye harakati za kutaka kumsajili mshambuliaji wa Celtic, Moussa Dembele.

Mchezaji huyo wa kimataifa wa Ufaransa amezivutia klabu nyingi kubwa za Ulaya, ikiwa ni pamoja na chelsea, kufuatia mwanzo mzuri katika msimu wake wa kwanza Scotland ambako amefunga mabao 32 katika mechi 45.

Kwa mujibu wa The Independent, Jose Mourinho anataka kuingia kwenye kinyang'anyiro cha kuiwania saini ya kinda huyo dirisha la uhamisho wa majira ya joto, kwani Mashetani Wekundu wamedhamiria kujenga kikosi chenye uwezo wa kuwania taji Uingereza msimu ujao.

Ripoti zinadai kuwa United wamepoteza haja ya kumsajili nyota wa Atletico Madrid Antoine Griezmann, kwa hiyo Dembele anabaki kuwa mchezaji nambari moja Mourinho anayemtaka kwenye kikosi chake.

Inaaminika Celtic wanamthaminisha mshambuliaji huyo, ambaye amefunga magoli matano Ligi ya Mabingwa msimu huu, kwa kiasi kisichopungua paundi milioni 30.