WITO KWENU WATUNZI

Tukutaneni wajuzi, magwiji  wa mashairi

Mafundi na wanafunzi, Sara na bwana Bashiri

Tuje na zetu kurunzi, tukajenge tafakari

Washairi mwasemani, ni swala makanikia

Tutungeni zetu tenzi,  ushairi ukifana

Kama hayati Mdanzi, mtunzi mzuri sana

Maneno yafate ngazi, tupange yakipandana

Washairi mwasemani, ni swala makinikia

Sisi pia ni wahunzi, mafundi kupanga vina

Hatujadili upuzi, uchambuzi wetu kina

Tunajulikana wazi, ni mabingwa wa kunena

Washairi mwasemani, ni swala makinikia

Njooni na wakufunzi, tena nawaomba sana

Watatua matatizi, pasipo ya kubishana

Tusiwe na pumbuwazi, pumbazo kushangazana

Washairi mwasemani, ni swala makinikia

Tuzitumie karama, jario la maulana

Tuitulize mitima, tujenge hoja za maana

Tutaepuka zahama, tukiacha chekeshana

Washairi mwasemani, ni swala makinikia

Sote mpate raha, pendezo la subuhana

Yanini hizi karaha, na kuzidi kushindana

Tunalifanywa majuha, mkubwa afanywa mwana

Washairi mwasemani, ni swala makinikia

Nanyi watunzi wa nyimbo, ninyi mnanguvu sana

Kwa ufundi wa kiimbo, na tungo zasikikana

Tu unasue urimbo, tena pasipo hiyana

Washairi mwasemani, ni swala makinikia