LIGI KUU BARA : "Simba itatwaa ubingwa" Laudit Mavugo

Mavugo, amesema ana uhakika wa timu yake kutwaa ubingwa wa msimu huu kwa kushinda mechi zote sita zilizosalia

Mshambuliaji wa kimataifa wa Simba raia wa Burundi, Laudit Mavugo, amesema ana uhakika wa timu yake kutwaa ubingwa wa msimu huu kwa kushinda mechi zote sita zilizo salia.
 
Mavugo ameiambia Goal, sababu ya kusema hivyo ni kutokana na ubora wa kikosi walichokuwa nacho hivi sasa ambacho kina ari ya kupambana na kutwaa ubingwa.
 
“Pamoja ya kutofautiana kwa pointi mbili na Yanga lakini Simba tupo vizuri ninaamini tutashinda mechi zote sita zilizobaki na kutwa ubingwa wa ligi ya Vodacom,”amesema Mavugo.
 
Mechi sita ambazo imezibakiza Simba ni dhidi ya Mbao FC, Toto Africans, Kagera Sugar, Mwadui FC, Stand United na African Lyon.
 
Mavugo amesema hakuna mechi nyepesi kwao kati ya hizo zilizobaki, lakini kwa pamoja watapambana kuhakikisha wanashinda zote.
 
Mavugo amesema watalazimika kushinda mechi hizo zote kwa lengo la kutowaruhusu Yanga wawapite au wawakaribie kwenye idadi ya pointi walizonazo kwa hofu ya kuongeza ugumu.
 
"Kila timu ina mikakati yake, lakini kwetu Simba tulichopanga ni kushinda mechi zote sita tulizobakiza katika msimu huu wa ligi kuu.
 
"Najua siyo kazi rahisi, lakini bidii na kujituma kwetu ndiyo kutafanikisha hayo yote, ninaamini tuna kikosi bora kitakachofanikisha hayo yote pamoja na umoja uliopo hivi sasa,” amesema.
 
Simba hivi sasa inaoongoza kwenye msimamo wa ligi hiyo, ikiwa na pointi 55, Yanga wakifuatia na pointi 53 huku Azam wakiwa wa tatu wenye 44.