MAMA FUTA MACHOZI

Mja wetu Maanani, akujazilize siha

Uimarike moyoni, upate nguvu fasaha

Jifute chozi usoni, itengeneze furaha

Mama jifute machozi, mtu si mali kitu

Waanamaji wa kwale, hufa maji mazoea

Tangu enzi zetu zile, mwiba guu huchelea

Hawaijui misukule, dogo kubwa potezea

Mama jifute machozi, mtu si mali kitu

Acha kulia we mama, mwanao ashapotea

Jilinde uwe salama, tumai utazoea

Anayejua karima,wapi tunaelekea

Mama jifute machozi, mtu si mali kitu

Alikuaga usiku, mama naenda safari

Safari kuchimba buku, twaenda kwa gari zuri

Ukafungua sanduku, ukampa na rozari

Mama jifute machozi, mtu si mali kitu

Safari ni ndefu hatua, kufika ni majaliwa

Hakuna anayejua, ni lipi amepangiwa

Ile Fumba kufumbua, mwana jina kabakiwa

Mama jifute machozi, mtu si mali kitu

Mama jivike ukambaa, kifua kivumilie

Sio vema kupumbaa, yakupasa utulie

Jiondoe vitambaa, vyafanya ujililie

Mama jifute machozi, mtu si mali kitu

Ahadi zao puuza, hazita kufuta chozi

Mwanao umemuuza, basi usivimbe fizi

Ulisema utakuza, sasa giza la ajizi

Mama jifute machozi, mtu si mali kitu

Pole yako iko wapi, faida kwao majengo

Walia paka sa ngapi, waache wenye vitengo

Vizazi vipo vingapi, Ala kaweka mtego

Mama jifute machozi, mtu si mali kitu

Kifo cha mwana kipenzi, faida yake ni jengo

Wanakupaka masizi, wanakupindisha shingo

Wanakuvisha irizi, wanakukata mgongo

Mama jifute machozi, mtu si mali kitu

Mungu wetu mpendevu, hulipa baya kwa wema

Jivike ukakamavu, kuyaona haya mama

Uwe mti mkavu, usiye pelekwa mrama

Mama jifute machozi, mtu si mali kitu