TUMESAHAU

Mayowe ya azimio, na mbiu nyingi angani

Tulipata mafanikio,toka bara  kule pwani

Tukafungua sikio,nuru kuja hadharani

Tumesahau tukotoka, mbuyu kama mchicha

Jua la utosi shamba, tulikunywa jasho letu

Tukajivika kwa kamba, watupu mbele wanetu

wote tukawa wembamba, wakanenepa wenzetu

Tumesahau tukotoka, mbuyu kama mchicha

Macho hatukufumba,simanzi zikwisha  katu

siamini katu kwamba,jasho lile la meatu

Hata la  kule mkamba,leo huosha viatu

Tumesahau tukotoka, mbuyu kama mchicha

Hatuna makimbilio,tunatapa tu vinywani

Vimetujaa vilio, kusaka mchawi nani

Tulimwaga visusio, ili  tujitoe tunduni

Tumesahau tukotoka, mbuyu kama mchicha

Tumebaki wa makisio,ya kesho za ndotoni

Iko wapi mishikio,ilokamata  garoni

Kwisha  tangu azimio,leo kauli vitani

Tumesahau tukotoka, mbuyu kama mchicha

Tumeyasahau yale,tuliyo yapigania

Na tulikotoka kule,tulianza  moja nia

Wanavyosema wale, walio tupigania

Tumesahau tukotoka, mbuyu kama mchicha