NYANG’AU

Mie ni mtu makini, muenda pole wa mwendo

Sipendezwi na utani, jumba langu ni upendo

Tendi zangu ni deni, uzisome bila bando

Umegeuka nyang’au, wanakuitaga mbojo

Linanyonya waziwazi, macho ukilifumbia

Ukilifanya ajizi, na  halitakuvungia

Linakula na jambazi, chumbani wajifungia

Umegeuka nyang’au, wanakuitaga mbojo

Nyang’au hana busara, shauri ajikatalia

Huluka zake za mara, tu wazo likimjia

Tena hana fikara, robo ukimpimia

Umegeuka nyang’au, wanakuitaga mbojo

Naliona lajihami, tena vingi vingorimbo

Hata anyosha ulimi, naupenda huo wimbo

Hadhira hina usemi, imechoshwa na vikumbo

Umegeuka nyang’au, wanakuitaga mbojo

Maji yanapochemka, hayasahau baridi

Ujipimie na  miaka , upunguze ukahidi

Chafua uliko toka, utajuta pa kurudi

Umegeuka nyang’au, wanakuitaga mbojo

Kwa wema na upole, dhamana uliiomba

Popo ni ndege Yule, sifaze umezilamba

Leo nyuma kesho mbele, unaendelea kuyumba

Umegeuka nyang’au, wanakuitaga mbojo

Urongo si njia ndefu, siku yako itafika

Nafuu yake hafifu, tegemea hilo gaka

Umekosa utukufu, kivuli umeongoka

Umegeuka nyang’au, wanakuitaga mbojo

Urongo hauna dogo, yapime uyasemayo

Usidharau madogo, wasikize wasemayo

Mmea hukua gogo, padogo huanziayo

Umegeuka nyang’au, wanakuitaga mbojo

Nyang’au embu geuka, usiogope kuchekwa

Usisite kuamka, kushika yetu matakwa

Tunakutambua  fika, rangiyo uliyopakwa

Umegeuka nyang’au, wanakuitaga mbojo

Mola nipe ushupavu, hila zao kuumbuwa

Wakizidisha maovu, nizidi kuwasumbuwa

Kwa beti zangu kavu, na viriba napasuwa

Umegeuka nyang’au, wanakuitaga mbojo