HASIDI WA NCHI YENYE KUSADIKIKA

Machukio we chukiza, wakere  walozubaa

Usijibane kuwaza, weka kiza  kwenye taa

Chukio lako dubwaza, tema sumu kutambaa

Nalichukia Hasidi, jabali mmeza haki

Kamata chini na kati, umalizie na juu

Kiziwi hana shariti, nani wa kuvunja guu

Hana kizazi thabiti, majuto si mjukuu

Nalichukia Hasidi, jabali mmeza haki

Mpanda ngazi hushuka, hupanda bila tetema

Aghalabu huanguka, wa mbele kurudi nyuma

Fyata funga na funguka, hili jumba liko mrama

Nalichukia Hasidi, jabali mmeza haki

Uso mng’avu hatari, na nywele zimepepea

Kwa mafuta ya uturi,  ni nngumu kuelezea

Kila kukicha safari, hajui kwa kwelekea

Nalichukia Hasidi, jabali mmeza haki

Nalisadiki fatiki, uchwara na subatisa

Hata shauri  hataki, shupavu kama kidisa

Eti yeye ni kisiki, hagawiki namba tasa

Nalichukia Hasidi, jabali mmeza haki

Tumtafute shujaa, afanane na Daudi

Asiyewaka tamaa, na kiu ya uhasidi

Yana katika masaa, atatolewa kwa radi

Nalichukia Hasidi, jabali mmeza haki

by Fulgence Makayula