SAFARI NI HATUA

Asubuhi kumekucha, Majogoo yanawika,

 Muda wa Mungu kumcha, Sisi tulosalimika,

 Tunashukuru kukucha, Tele ikiwa mizuka,

Ewe Msafiri leo, nenda urudi salama

Kengere ya kanisani, yatua kutuamsha

Kuwaita waumini, usingizi ukakwisha

Nina simu mkononi, na kisha nikaiwasha

Ewe Msafiri leo, nenda urudi salama

Moyo umenisituka, kukutana na ujumbe

Jasho lanitiririka, laweza jaza vikombe

Mpenzi liye sirika, kanitumia ujumbe

Ewe Msafiri leo, nenda urudi salama

Muheza naelekea, Mapema nilikwambia, 

Shughuli kusherekea, rafiki unamjua,

Siku nitaporejea,kuna jambo takwambia

Kwaheri wangu lazizi, nitarejea salama

Ndivyo ilivyosomeka, meseji yake ya mwisho.

Hili si lakupingika, nikahisi ni michosho,
Moyo ulinidundika, kwanini ajitie ficho,

 Ewe Msafiri leo, nenda urudi salama

 Safari ndefu hatua, nenda ufike salama

Sawa nimeshatambua, ufikapo utasema

Nami nipate kujua, ujumbe nikautuma

Ewe Msafiri leo, nenda urudi salama

Nikaamka vizuri, kwa kudra za Maulana

Kazi nikazikabiri, ni jambo langu la mana

Siku iende vizuri, mwana wa Juma Kibwana

Ewe Msafiri leo, nenda urudi salama

Yakakatika masaa, ujumbe nikautuma

Sebuleni nimekaa, tivii ninatazama

Nakujulia wasaa, kama umefika vema

Ewe Msafiri leo, nenda urudi salama

Mpenzi wangu ufizi, mie meno sina hali

We mganga mfawizi, nijibu vipiyo hali

Hee jamani bebizi, mbona huna kauli

Ewe Msafiri leo, nenda urudi salama

Ghafla ninasitushwa, taarifa ya habari

Puu nikaangushwa, nishapatwa na hatari

Nguvu zimepunguwa,nashindwa kujisitiri

Ewe Msafiri leo, nenda urudi salama

NB: Simulizi kwa njia ya mashairi, haya ni masimulizi ya kusisimua ya visa vya kweli na vya kubuni, vitakuwa vinakujia hapahapa AKISITV.COM kwenye kurasa ya UTAMU WA FASIHI,

Anza sasa kufatilia kila siku ili uweze kuonja na kuufaidi utamu wa Fasihi