KIBITI JASHO LA DAMU

Sisi wana Tanzania, Baba na akina mama

Kwanini twajililia, twatakiwa kusimama

Wao wanafikiria, hadha haiachi koma

Kibiti ni fumbo gani,Amiri ulitatuwe

Tusiwe mapunguani, tusiojua alama

Inayotakiwa kani, kuulilia uzima

Kupigana mapigani, wima hata kuchutama

Kibiti ni fumbo gani,Amiri ulitatuwe

Hili jambo si utani, legelege kusimama

Si utani wa jirani,na mzaliwa na mama

Tulinde yetu amani, watu tukae salama

Kibiti ni fumbo gani,Amiri ulitatuwe

Tuipeleke amani,kwa akili na hekima

Busara ziwe vichwani,tupambane tukipima

Jambo si la vitabuni,tulitafakari vema

Kibiti ni fumbo gani,Amiri ulitatuwe

Wana  hawatoki ndani,Wawahofia khasima

Kama tulivyo amini,tangu zamani za zama

Hii nchi ya amani , yafatani i dhahama

Kibiti ni fumbo gani,Amiri ulitatuwe

Mzandiki mhaini, wala hana nia njema

Hatutaki watudhani, jinga lenye kukoroma

Jinga la moto jikoni, likizimwa hufuruma

Kibiti ni fumbo gani,Amiri ulitatuwe

Huu wetu mtihani, haraka kuusukuma

Haijai kiganjani, sehemu yenye unyama

Tunakesha maofisini, bila hata kusimama

Kibiti ni fumbo gani,Amiri ulitatuwe

Amiri msikiani, na hili ulisikize

Kibiti ni mtihani, haraka ukatatuze

Wale wana watanzani, wataka uwaliwaze

Kibiti ni fumbo gani,Amiri ulitatuwe