POKEA SIMU YANGU MKULU

Allahuma ya manani, Mola usie shirika

Nakuomba ya dayani, unipe nyingi Baraka

Uniweke furahani, hi  simu ikisikika

Nakupigia mkulu, upokee simu yangu

Nimeivuka mipaka, umbali nimesafiri

Mpaka hapa mefika, ni ngumu hii safari

Mekuja kwa uhakika, uwepo nikabashiri

Nakupigia mkulu, upokee simu yangu

Nimeyachosha magoti, nyumbani kwako haupo

Nimetumia manoti, tena yale ya mkopo

Nimeazima na koti,lile la bwana mwipopo

Nakupigia mkulu, upokee simu yangu

Pokea yangu simu, nikupe yalo nileta

Sina hata na  kalamu, ningechora mpepeta

Umtafute  binamu, mwende mpate  kuteta

Nakupigia mkulu, upokee simu yangu

Nime yanuia mema, shauri kukupatia

Walahi mi sitokoma, agizo hili sikia

Maisha kama ukoma, na yeyote humwingia

Nakupigia mkulu, upokee simu yangu

Na kusema bila shaka, mkulu umekosea

Kwa waziri msifika, pale ulipopotea

Najua uliponzeka, wapi unaelekea

Nakupigia mkulu, upokee simu yangu

Ninakuibia siri, hii ni ya faraghani

Ijengee tafakari, ubaki nayo moyoni

Kikulacho kifikiri,  ukitazame machoni

Nakupigia mkulu, upokee simu yangu

Wanakuibia soga, haohao wa chumbani

Tena pasipo uoga, wajifanya marubani

Mla ua paka boga, wanatafuna shinani

Nakupigia mkulu, upokee simu yangu

Nimeletwa nina mengi, nasaha kukukabidhi

Haya yote yamsingi, uzipunguze bugudhi

Na jirani yako mangi, asema wapata radhi

Nakupigia mkulu, upokee simu yangu

Mnyonge kupata haki, nimesikia ni ndoto

Iwapo akishitaki, malipizo ni msoto

Na mwenye nguvu hutaki, kufanywa kama mtoto

Nakupigia mkulu, upokee simu yangu

Zile sifa za kinyonga, hakika nimeziona

Ahadi kama mganga, sasa tunatafutana

Mgonjwa ulokosa kinga, ayamkini kupona

Nakupigia mkulu, upokee simu yangu