MPYA : DUBWANA LATUTAFUNA

Himahima amkeni, twendeni kwenye mabio

Tokeni usingizini, tupunguzeni vilio

Mashariki na kusini, tuliwahini tukio

Dubwana latutafuna, twendeni kulikabili

Harahara hilo jiti, waelekezea macho

Mtumwa yake masharti, hilo wazi bila ficho

Vijana vueni shati, mzee beba pendacho

Dubwana latutafuna, twendeni kulikabili

Tukaufanye mtiti, dubwana lile uchocho

Tukavunje vizingiti, kumbe yeye kikulacho

Towashi wa tashititi,ni nini halingiacho

Dubwana latutafuna, twendeni kulikabili

Lina nyonya damu hili, latuibia pumzi

Lajionesha dhahili, pasipo na pingamizi

Suraye ya ubahili,imetupaka masizi

Dubwana latutafuna, twendeni kulikabili

Latafuna watu wengi, Huruma lisionewe

Watu wabaki vichungi, lataka linyenyekewe

Tujiwekee misingi, lenyewe likapagawe

Dubwana latutafuna, twendeni kulikabili

Acheni za Ubepari, hima tukalikabili

Tena tukiwa na ari, ili tukalidhalili

Tujipange kwa nambari,Tuwe idadi kamili

Dubwana latutafuna, twendeni kulikabili

Kulia na kwa kushoto,tazameni kotekote

Mambo mpwitompwito, asipenyeze popote

Tuliwashieni moto, lisiteme hata mate

Dubwana latutafuna, twendeni kulikabili

Dubwana hili jasiri, twendeni tukitazama

Tukiwa na tafakari, na mbinu zenye hekima

Umoja  wetu dhahiri, tupiganie kwa mema

Dubwana latutafuna, twendeni kulikabili

Twapinga usulutani,vita yetu ubwanyenye

Tuzikate hizi cheni,mapuro tuyapuziye

Haya tuzingatieni,na kazi nzuri tufanye

Dubwana latutafuna, twendeni kulikabili

Busara hizi pimeni,achaneni kubweteka

Niliyo nena betini, yasije yakawatoka

Jazeni na matumboni, mkapate kutosheka

Dubwana latutafuna, twendeni kulikabili

By Fulgence Makayula