CHANDA CHA PETE

Nina jivika upofu, kwa navyo shindwa tazama

Kwa mawazo yangu nyofu, fikara sizo chutama

Hakuna cha upotofu,  jicho pevu kutazama

Azima ya moyo wangu, chanda cha pete fikiri

Chanda nilikuchagua, moyo wangu kutiisha

Tena nilikubagua, kwa misingi ya maisha

Kama jua limetua, joto umelikatisha

Azima ya moyo wangu, chanda cha pete fikiri

Wewe ndiye  wapekee, kwa ndugu zako watano

Ukipenda nikemee, ntajifunza kwa mifano

Sikupenda ulegee, tena niliuma meno

Azima ya moyo wangu, chanda cha pete fikiri

Chanda changu kitulivu, usie penda mapuro

Najua u msikivu, na usiyetaka kero

Yakatae machakavu, yamenipaka uchuro

Azima ya moyo wangu, chanda cha pete fikiri

Ni wapi nilikosea, hata nashindwa kung’amua

Kule niliko potea, ni vipi nitagundua

Mbona nilikupepea, kwa huba njema za dua

Azima ya moyo wangu, chanda cha pete fikiri

Mimi nilifunga nia, kwa penzi loshikamana

Nilifurahi kuingia, kwa pendo la kujichana

Siri sikujifichia, nilikuweka bayana

Azima ya moyo wangu, chanda cha pete fikiri

Ndugu niliwaambia, na bibi akaafiki

Ndugu wakanihusia, ni wachunge wanafiki

Tuiogope Dunia, isije kutupa chuki

Azima ya moyo wangu, chanda cha pete fikiri

Chanda usinichukie, husuda kuchukiana

Juto lisikuingie, moyoni likajazana

Msamaha nipe mie, tupate kuelewana

Azima ya moyo wangu, chanda cha pete fikiri

Nilikuvika dhahabu, nikakupa alimasi

Ni ipi kubwa sababu, inanipaka kamasi

Nalijitia  ububu, kukupatia wepesi

Azima ya moyo wangu, chanda cha pete fikiri

Ulizichukia gubu, nakumbuka ulisema

Ulijawa na  gadhabu, hata juu ukahema

Ila yote nilitubu, hali ikawa salama

Azima ya moyo wangu, chanda cha pete fikiri