AKUPENDE NANI

Unajipa kazi nyingi, kuvimaliza viunga

Mume asikate ringi, na sindino wajidunga

Hujui lipi la msingi,umekuwa kama nanga

Usijisumbue dada, na utapendwa na nani

Washinda mitandaoni, kutafuta viongeza

Ufutuke tu nyumani, ubane vya kulegeza

Huna amani moyoni, akili unabobeza

Usijisumbue dada, na utapendwa na nani

Walikuwako zamani, mababu na mabibizo

Mafundi wa kitandani, wa mababu kitulizo

Walichoongeza nini, kuutafuta ujazo

Usijisumbue dada, na utapendwa na nani

Unahangaika nini, mpaka unapauka

Kutuvalia kimini, huoni unaumbuka

Tamu ya penzi amani, ijenge itajengeka

Usijisumbue dada, na utapendwa na nani

Ongezea na hekima, ipate kuimarika

Uzingatie heshima, pasipo kujali rika

Busara iwe kisima,na iweze kuchoteka

Usijisumbue dada, na utapendwa na nani

Mume kama dunia, haidhiriki kwa umbo

Acha kuhangaikia, utapoteza urembo

Utakuja kujutia, utapobakia fimbo

Usijisumbue dada, na utapendwa na nani

Unaongeza midomo, unaongeza matako

Unajichimbia shimo, mume umpe makoko

Utarefusha na kimo, na kubadili misuko

Usijisumbue dada, na utapendwa na nani

Unaongeza matiti, unabadilisha rangi

Unajenga vizingiti, wamkosa bwana mangi

Huna mvuto thabiti, ni kweli ya Mungu mengi

Usijisumbue dada, na utapendwa na nani